Eiður Smári Guðjohnsen fagnar reglubreytingu hjá ensku úrvalsdeildinni er snýr að auglýsingum veðmálafyrirtækja framan á treyjum félaga. Hann opnar sig um eigin vandamál í tengslum við veðmál við Mirror, en það er Vísir sem vekur athygli á viðtalinu.
Eiður segir frá því í viðtalinu að hann hafi tapað því sem nemur rúmum milljarði íslenskra króna á veðmálum fyrir um 20 árum síðan, þegar hann var á hátindi ferilsins.
Bannið við veðmálaauglýsingum framan á treyjum í ensku úrvalsdeildinni tekur gildi 2026. Eiður telur að þetta hefði átt að gerast fyrr.
„Allir fótboltaáhugamenn, allir krakkar í heimi eru með augun á treyjunni. Styrktaraðilinn framan á treyjunni sendir sterk skilaboð. Auglýsendur hafa svo mikil áhrif,“ segir Eiður.
„Þetta hefur áhrif á alla því við sjáum þetta í sjónvarpinu, á auglýsingaskiltum og á treyjum. Þetta verður hluti af lífum okkar. Bannið sendir sterk og jákvæð skilaboð.“
Eiður bendir á áhrifin sem það hafði þegar Barcelona auglýsti UNICEF framan á treyjum sínum á árum hans þar til að undirstrika mikilvægi þess að viðeigandi auglýsendur séu framan á treyjum.
Íslenska knattspyrnugoðsögnin segir að hann hafi verið að ná sér af meiðslum þegar hann fór að veðja í miklum mæli. Hann hafi stundum eytt tvö þúsund pundum á einn snúning í rúllettu á netinu.
„Knattspyrnumenn finna fyrir mikilli pressu að standa sig og vera alltaf að toppa. Það getur haft mikil áhrif þegar hlutirnir fara ekki eins og þú vilt. Stundum leitar þú í annað til að ná í adrenalínkikk eða þess háttar. Fyrir suma eru það veðmál, aðra áfengi eða eitthvað annað.“
Eiður tekur nú þátt í átakinu #TalkMoreThanFootball. Markmiðið er að hvetja knattspyrnuaðdáendur til að ræða annað en fótbolta.
„Þegar þú lest þér til um tölfræðina um það hversu margir eiga í andlegum erfiðleikum og taka sitt eigið líf áttar þú þig á að það þarf að gera eitthvað. Fólki finnst auðvelt að tala um fótbolta og það gerir þeim kleift að tjá tilfinningar sínar. Samt virðist erfitt fyrir þau að tala um tilfinngar sínar á dýpra stigi.“
