Samkvæmt heimildum 433.is var ekki einhugur í stjórn KSÍ sem fundaði í tvígang og komst að þeirri niðurstöðu að reka Arnar Þór Viðarsson úr starfi.

Stjórninn fundaði fyrst á miðvikudag og kom svo aftur saman í gær og ákvað þá að reka Arnar Þór úr starfi eftir tvo leiki í undankeppni Evrópumótsins.

Samkvæmt heimildum voru fleiri en einn aðili sem setti sig á móti þeirri ákvörðun að reka Arnar Þór. Hefur tímasetningin á brottrekstri hans vakið furðu margra.

Arnar Þór hafði verið valtur í sessi á síðasta ári en fékk traustið frá Vöndu Sigurgeirsdóttur og stjórn til að fara inn í nýja undankeppni.

Samkvæmt heimildum taldi Arnar Þór þó að brottrekstur gæti orðið niðurstaðan í vikunni eftir snubbótt samskipti við formann KSÍ eftir sigurinn á Liechtenstein en hún fór ekki í ferð landsliðsins vegna aðgerðar sem hún var í.

Aðeins Ívar Ingimarsson fór fyrir hönd stjórnar í verkefnið á dögunum þar sem liðið tapaði illa gegn Bosníu en vann frækinn sigur á Liechtenstein. Var talið að Arnar Þór fengið hið minnsta verkefnið í júní áður en staðan yrði skoðuð. Stjórn KSÍ komst hins vegar að annari niðurstöðu.

Ívar átti í afar litlum samskiptum við þjálfarateymið á meðan verkefninu stóð samkvæmt sömu heimildum.

„Ég skil gagnrýnina á tímasetninguna. En þegar stjórnin hefur ekki trú og traust og við höldum ekki að þjálfarinn sé rétti maðurinn þá verðum við að taka svona ákvörðun,“ sagði Vanda í gær

Arnar var allt annað en vinsæll hjá íslensku þjóðinni. Hafði það eitthvað með ákvörðun Vöndu og stjórnarinnar að gera?

„Við erum í þessu samfélagi og við heyrum þetta allt saman. Í raun var þetta svona frá byrjun, frá því hann var ráðinn. Hann er ekki öfundsverður af þessu. Ég myndi samt ekki segja það. Þetta snýst meira um þá trú sem við höfum. Við teljum að við þurfum annan þjálfara til að ná markmiðum okkar. Trúin á að Arnar væri rétti maðurinn var ekki lengur til staðar,“ segir Vanda Sigurgeirsdóttir.