Cesc Fabregas hefur aftur opnað sig um af hverju hann gekk ekki í raðir Arsenal árið 2014 er hann yfirgaf Barcelona.
Fabregas lék með Arsenal frá 2003 til 2011 en lék svo með Barcelona í þrjú ár og samdi svo við Chelsea, nágranna Arsenal.
Arsene Wenger, þáverandi stjóri Arsenal, vildi ekki fá Fabregas aftur til félagsins en hann taldi sig ekki hafa not fyrir Spánverjann.
,,Ég vildi svo mikið fara aftur í ensku úrvalsdeildina og hafði sagt sjálfum mér að þegar ég myndi kveðja Barcelona þá yrði Arsenal númer eitt,“ sagði Fabregas.
,,Þeir höfðu viku til að svara mér. Við ræddum við Arsenal og sögðum þeim að ég væri á förum og að þeir hefðu viku til að ákveða sig. Í heila viku gat ég ekki rætt við neitt annað félag.“
,,Eftir viku þá hringdum við í Arsene og hann hafði hugsað sig um – hann tjáði mér að þeir væru með marga leikmenn í þessari stöðu eins og Mesut Özil, Santi Cazorla, Jack Wilshere og Aaron Ramsey.“
,,Hann sagðist þurfa að spila einhverjum út úr stöðu til að fá mig en ég held að hann hafi einnig verið smá særður yfir því hvernig ég yfirgaf félagið og allt það.“
