Bernd Leno opnaði sig um brottförina frá Arsenal í nýju viðtali. Þjóðverjinn, sem er á mála hjá Fulham, á enn gott samband við Skytturnar.
Hinn 31 árs gamli Leno var markvörður Arsenal frá 2018 til 2022. Hann missti sæti sitt snemma á síðustu leiktíð eftir að Aaron Ramsdale var keyptur.
„Ég ber engan kala til Arsenal. Þetta endaði ekki á besta mátann en það var tekið mjög vel á móti mér þegar ég sneri aftur á Emirates-völlinn. Stuðningsmenn komu upp að mér og þökkuðu mér fyrir þessi fjögur ár hjá Arsenal, sögðu mér að ég hafi staðið mig vel,“ segir Leno, en hann spilaði með Fulham gegn Arsenal fyrr á tímabilinu og tapaði naumlega.
„Ég var mjög ánægður með hvernig ég stóð mig. Ég hafði ekki gert neitt rangt þegar ég var tekinn úr liðinu. Ég kom inn um aðaldyrnar og aftur út um þær. Ég tengist félaginu enn.“
Leno sér alls ekki eftir því að hafa valið Fulham sem næsta áfangastað á eftir Arsenal.
„Það var alveg klárt að mig langaði að vera áfram í ensku úrvalsdeildinni. Þetta er langbesta deild í heimi. Ég elska líka lífið í London.
Ég ræddi við fólk hjá Arsenal og sagði að mig langaði til Fulham. Allir sögðu að þetta væri flottur fjölskylduklúbbur. Ég spilaði oft gegn Fulham og þetta er gamaldags leikvangur. Allt spilaði þettainn í.“
Gengið hjá Fulham hefur verið framar björtustu vonum.
„Markmiðið fyrst var að halda okkur í deildinni. Nú erum við komnir í 8-liða úrslit enska bikarsins og sitjum í sjöunda sæti deildarinnar. Enginn hefði getað séð þetta fyrir.“
