Stórfrétt birtist í enska götublaðinu The Sun í morgunsárið af Harry Kane. Þar kemur fram að hjá Manchester United séu menn nokkuð bjartsýnir á að landa framherjanum. Til þess þyrfti þó eitt og annað að ganga upp.
Hinn 30 ára gamli Kane hefur verið orðaður við United undanfarið. Samningur enska landsliðsfyrirliðans við Tottenham rennur út eftir næstu leiktíð.
Tottenham er sem stendur í hörkubaráttu um sæti í Meistaradeild Evrópu á næstu leiktíð. Á sama tíma er United í góðri stöðu hvað það varðar.
Æðstu menn á Old Trafford hafa sett sig í samband við fulltrúa Kane í gegnum þriðja aðila. Gengu þeir bjartsýnir frá því samtali og telja að vel raunhæft verði að fá leikmanninn ef Tottenham mistekst að landa Meistaradeildarsæti.
Tottenham er sagt vilja um 100 milljónir punda fyrir Kane í sumar, þrátt fyrir að hann eigi aðeins ár eftir af samningi sínum. United telur að félagið lækki verðmiðann ef liðinu mistekst að komast í Meistaradeildina.
Það má ætla að hugsanleg kaup United á Kane velti einnig á því hvort nýir eigendur frá Katar komi inn í félagið, eins og rætt hefur verið um. Glazer-fjölskyldan, sem nú á Rauðu djöflanna, hefur ekki viljað dæla peningum í leikmenn undanfarið.
Sumarið 2021 var Kane nálægt því að fara til Manchester City en allt kom fyrir ekki. Nú er félagið í bláa hluta Manchester komið með Erling Braut Haaland og verður því ekki með í neinni baráttu um Kane.
Englendingurinn á enn eftir að vinna titil á ferli sínum. Hann er þegar orðinn markahæsti leikmaður í sögu Tottenham en gæti farið að þyrsta í eitthvað meira.
Á þessari leiktíð hefur Kane skorað 18 mörk fyrir Tottenham.
