Ruud Gullit, fyrrum knattspyrnustjóri Newcastle United hefur leyst frá skjóðunni varðandi ummæli sem eiginkona Alan Shearer, fyrrum leikmanns síns og goðsagnar í sögu Newcastle United, viðhafði um sig í partýi árið 2014 og kunna koma mörgum á óvart.

Gullit var, fyrir afrek Eddie Howe á dögunum, síðasti knattspyrnustjóri Newcastle United til þess að stýra félaginu í úrslitaleik þar sem félagið á endanum laut í lægra haldi gegn Manchester United í úrslitaleik enska bikarsins árið 1999.

Um komandi helgi mætir Newcastle United aftur til leiks í úrslitaleik, nú í ensku deildarbikarkeppninni, en andstæðingurinn verður sá sami, Manchester United.

Í aðdraganda leiksins hefur Gullit rifjað upp tíma sinn hjá Newcastle United, meðal annars þá afdrifaríka ákvörðun sína á sínum tíma að bekkja aðalmann Newcastle á þessum tíma, framherjann Alan Shearer fyrir leik liðsins gegn erkifjendunum í Sunderland, leik sem tapaðist.

Gullit var rekinn frá félaginu þremur dögum eftir tapið gegn Sunderland og á dögunum rifjaði hann upp samskipti sín við eiginkonu Shearer árið 2014 þar sem umrædd ákvörðun hans, sem var afar umdeild, kom aftur til tals.

,,Við Alan Shearer störfuðum saman í teymi ITV í kringum HM 2014 og einhverra hluta vegna endum við saman í partýi eitt kvöldið þar sem að við hlógum og drukkum saman.“

Eiginkona Alan Shearer var einnig í partýinu.

,,Hún kemur upp að mér og segir: ´Ég trúi þessu ekki, á okkar heimili varst þú maðurinn sem allir hötuðu og nú eru þið tveir saman að hlægja og grínast í hvor öðrum’.

Gullit segir þetta gott dæmi um að stundum eru menn ekki sammála en geti samt sem áður á sama tíma sýnt hvor öðrum virðingu.

,,Við Alan höfðum oft hisst í störfum okkar sem knattspyrnusérfræðingar en þetta umrædda kvöld áttum við mjög vel saman.