Cristiano Ronaldo var á meðal þeirra sem sáu vel um Martin Ödegaard er þeir voru saman hjá spænska félaginu Real Madrid.

Ödegaard gekk í raðir Real árið 2015 og varð yngsti leikmaður í sögu félagsins til að spila leik er hann tók við af Ronaldo í 7-3 sigri á Getafe árið 2016.

Ödegaard náði aldrei að festa sig í sessi hjá Real en leikur í dag fyrir Arsenal og þykir vera einn besti miðjumaður ensku deildarinnar.

Norðmaðurinn spilaði aðeins átta deildarleiki fyrir Real en fékk góð ráð frá eldri leikmönnum liðsins á þessum tíma.

,,Það eina sem ég hugsaði var hvernig þessir náungar myndu taka á móti mér, litla stráknum sem talaði enga spænsku,“ sagði Ödegaard.

,,Þeir voru allir svo vinalegir og þeir sem töluðu ensku, Toni Kroos, Luka Modric og Ronaldo sáu sérstaklega um mig í byrjun. Þeir gáfu mér ráð sem hjálpuðu mér mikið.“

,,Í fullri hreinskilni þá held ég að þeir hafi ekki haft miklar áhyggjur af því að 16 ára strákur frá Noregi myndi taka sætið af þeim í byrjunarliðinu.“