Guðmundur Benediktsson, einn ástælasti sparkspekingur og lýsandi okkar Íslendinga, skilur ekkert í fólki sem mætir ekki á völlinn hjá sínu liði hér heima til að styðja það.

Guðmundur er gestur í nýjasta þætti Chess After Dark, þar sem meðal annars var farið yfir dapra mætingu á leiki í Bestu deild karla. Guðmundur fjallar um deildina á Stöð 2 Sport.

Hann segir að það sé sérstaklega mikið áhyggjuefni fyrir stærstu lið landsins hversu slæm mætingin er. Við lok hins hefðbundna leiktímabils í ár verður deildinni skipt upp í tvo hluta, efri sex og neðri sex.

Sem stendur er Valur í fimmta sæti og KR í sjötta sæti, svo dæmi séu tekin. Þá er stórlið FH í tíunda sæti deildarinnar.

„Hvaða lið sem það verður af þessum stóru, ef þau lenda í því að spila þarna í neðri hlutanum, þá verður það gríðarlegt áfall. Áhorfendatölur hafa ekki verið stórmerkilegar en þær verða sorglegar þá fyrir þessi lið,“ segir Guðmundur.

„Ég bara skil ekki þetta fólk sem er ekki að mæta á völlinn. Þú verður að mæta og styðja liðið þitt. Flestar af þessum rækjusamlokum sem öskruðu hæst í Covid, að það væri alveg vonlaust að fá ekki að fara á völlinn, eru ekkert að koma núna heldur.“

„Það er fátt skemmtilegra en að fara á völlinn og hitta allavega skemmtilegt fólk, þó fótboltinn sé ekki alltaf frábær“