Manchester United mun, samkvæmt spænska blaðinu Sport, gera enn eina tilraunina til að reyna að landa Frenkie de Jong, miðjumanni Barcelona.
De Jong hefur verið mikið orðaður við Man Utd í allt sumar. Börsungar eru til í að selja leikmanninn en skulda honum hins vegar laun. Félagið er í gífurlegum fjárhagsvandræðum og þarf helst að selja leikmanninn.
Erik ten Hag, stjóri Man Utd, vann með de Jong hjá Ajax á árum áður og kann virkilega vel við hann.
Sport segir að ten Hag telji sig hafa sannfært leikmanninn um að koma til Man Utd og því sé bjartsýni á að samningar náist.
Man Utd olli gífurlegum vonbrigðum á síðustu leiktíð og hafnaði í sjötta sæti, langt frá sæti í Meistaradeild Evrópu. Ten Hag reynir nú að byggja upp nýtt og betra lið.
