Marc Cucurella er ekki á leiðinni í klippingu þrátt fyrir mjög óheppilegt og ósanngjarnt atvik sem átti sér stað í ensku úrvalsdeildinni um helgina.

Cucurella var rifinn niður í teignum í 2-2 jafntefli Chelsea og Tottenham stuttu áður en Tottenham jafnaði í blálokin.

Christian Romero hjá Tottenham reif Cucurella niður með því að toga í hár varnarmannsins en hann skartar töluverðum krullum.

Flestir eru sammála um það að um klárt brot hafi verið að ræða og er Spánverjinn sammála því.

,,Að mínu mati var þetta alltof augljóst það sem gerðist. Ég sá myndbandið ekki í sjónvarpinu,“ sagði Cucurella.

,,Ég tel að þetta séu augljós mistök frá dómaranum eða VAR. Stundum taka þeir góðar ákvarðanir og stundum ekki.“

Aðspurður að því hvort hann myndi í kjölfarið fara í klippinu svaraði leikmaðurinn: ,,Nei, aldrei. Þetta er minn stíll!“