Cristiano Ronaldo hefur fengið aðvörun frá lögreglu eftir atvik sem átti sér stað eftir leik Manchester United og Everton í ensku úrvalsdeildinni í vor.
Ronaldo var pirraður eftir 1-0 tap. Þegar leikmenn gengu af velli virtist Ronaldo slá einhverju frá sér. Það var síðar staðfest að það var sími hins 14 ára gamla Jacob.
„Hann er svo leiður yfir þessu og hann vill ekki fara aftur á leik. Þetta var fyrsti leikurinn sem hann fer á og þetta gerist. Þetta var frábær dagur alveg fram að þessu. Þetta eyðilagði daginn og skilur okkur eftir með óbragð í munni,“ sagði móðir drengsins á sínum tíma. Áverka mátti sjá á höndum Jacob.
„Það var ráðist á einhverfan dreng af knattspyrnumanni. Þannig sé ég þetta sem móðir.“
Ronaldo hefur nú hlotið aðvörun frá lögreglu, auk þess sem hann hefur samþykkt að greiða drengnum skaðabætur.
Hér má sjá áverka drengsins eftir atvikið, sem móðir hans birti í vor.