Nú er hálfleikur í leik Íslands og Albaníu í Þjóðadeildinni. Leikið er á Laugardalsvelli. Gestirnir leiða 0-1. Markið skoraði Taulant Seferi.
Kári Árnason og Rúrík Gíslason, fyrrum landsliðsmenn, eru sérfræðingar Viaplay á leiknum og gerðu upp fyrri hálfleikinn.
„Þetta leit ágætlega út í byrjun leiks. Mér fannst Andri Lucas ferskur og koma með ákveðin gæði. Arnór var sprækur,“ sagði Kári. „Svo taka Albanir bara yfir, sérstaklega rétt áður en þeir skora og út fyrri hálfleikinn.“
Seferi skoraði markið á 30. mínútu en hann fylgdi eftir skoti Amir Abrashi og skoraði af stuttu færi. „Bakvörðurinn verður að fara út í kantmanninn. Bakvörðurinn verður að fara út í kantmanninn. Bakverðirnir eru að styðja alltof mikið við miðverðina okkar,“ sagði Rúrik.
„Við erum að spila við Albaníu, þetta er ekki Frakkland,“ skaut Kári inn í.
Einhverjir hafa sett spurningamerki við Rúnar Alex Rúnarsson, markvörð Íslands, í markinu. „Ég veit ekki hvort Rúnar geti gert betur. Það er erfitt að meta það,“ sagði Kári.