Eiður Smári Guðjohnsen fór yfir víðan völl í hlaðvarpsþættinum Fimleikafélagið á dögunum.
Þessi goðsögn í íslenskri knattspyrnu er nýtekin við sem þjálfari FH. Sigurvin Ólafsson verður honum til aðstoðar.
Á einum tímapunkti í viðtalinu barst talið að framhaldsskólagöngu Eiðs Smára. Eiður fór í Menntaskólann við Sund en dvölin varði ekki lengi.
„Minn menntaskólaferill er frábær,“ sagði Eiður léttur í bragði. Hann hélt áfram. „Ég endaði á að fara í MS. Ég var þar í svona sex vikur, vitandi að ég væri að fara að skrifa undir atvinnumannasamning í Hollandi. Ég lærði ekki mikið, ég var bara þarna,“ sagði Eiður. Hann skrifaði undir hjá PSV eftir stutta dvöl í framhaldsskóla.
Eiður sagði í viðtalinu að einbeiting hans þennan stutta tíma í framhaldsskóla hafi ekki farið á námið sjálft. „Þetta var meira bara til að vera ekki heima sofandi eða hafa ekkert að gera. Ég lagði meiri áhuga í frímínútur og hádegismat heldur en skólastofuna.“
Næsti leikur Eiðs Smára og hans lærisveina í FH er á mánudag gegn Stjörnunni í Bestu deildinni.