Ryan Giggs hefur látið af störfum sem landsliðsþjálfari Wales. Hann er sakaður um gróft heimilisofbeldi gegn fyrrverandi kærustu sinni, Kate Greville. Réttarhöld yfir honum fara ekki fram fyrr en í ágúst og telur Giggs þau óþarfa truflun í undirbúningi Wales fyrir Heimsmeistaramótið í nóvember.
Robert Page mun því halda áfram að stýra velska liðinu. Hann hefur stigið inn í fjarveru Giggs.
Lögregla var kölluð til á heimili Giggs og Greville í úthverfi Manchester í nóvember 2020 og var Giggs handtekinn á heimili sínu. Greville sakar hann um gróft líkamlegt ofbeldi.
Ensk blöð segja að lætin þeirra á milli hafi byrjað þegar hún ásakaði Giggs um að vera að halda framhjá sér og að konurnar væru tvær sem hann væri að hitta.
Framhjáhald væri ekki nýtt af nálinni í lífi Giggs. Giggs og Greville hafa verið saman síðustu ár en Giggs gekk í gegnum skilnað árið 2013 eftir að upp komst um framhjáhald hans til margra ára. Giggs hafði þá verið að sofa hjá eiginkonu bróður síns í átta ár.
Ensk blöð segja að Greville hafi komist í skilaboð í Ipad í eigu Giggs sem var tengdur við síma hans, þar gat hún skoðað skilaboð frá stelpum og er talað um að talsvert hafi verið daðrað í þeim skilaboðum. Greville þekkir konurnar, önnur starfar sem aðstoðarmanneskja knattspyrnumanna í London og hin er fyrirsæta sem býr nálægt þeim í Manchester.
Parið hafði verið að drekka saman í miðborg Manchester þegar þau komu heim á sunnudagskvöldi, ensk blöð segja sambandið hafa lengi staðið á bláþræði fyrir atvikið en Kate flutti út af heimilinu degi eftir meinta árás.
Sjálfur neitar Giggs ásökununum.