Um helgina birtist grein á vef The Athletic þar sem rætt var við unga stuðningsmenn sem staddir voru á Stade De France á úrslitaleik Meistaradeildar Evrópu. Þar vann Real Madrid lið Liverpool.
UEFA hefur fengið harða gagnrýni fyrir skipulag leiksins. Fjöldi fólks komst inn án miða og troðningur myndaðist. Lögregla beitti þá táragasi á saklausa vallargesti. Bæði UEFA og yfirlögreglan í París hafa viðurkennt mistök.
„Ég hélt að einhverskonar sprengja hefði sprungið. Ég var hræddur vegna þess að ég gat ekki andað eðlilega, þetta er eitthvað sem ég hafði aldrei upplifað áður. Hver stóð á bakvið þetta? Pabbi sagði lögreglan og ég varð enn hræddari vegna þess að ég hélt að lögreglan ætti alltaf að hjálpa fólki,“ sagði hinn níu ára gamli Carlos um upplifun sína af leiknum.
„Ég skildi ekki almennilega hvað hafði átt sér stað fyrr en pabbi sagði mér það nokkrum dögum seinna. Ég setti Liverpool trefilinn minn yfir vitin, góð kona kom síðan til mín með andlitsgrímu og vatn. Mig sveið svo í augun og grét mikið.“
Táragassprengja lenti rétt hjá Carlosi og pabba hans. „Hann datt og ég varð hræddur, vildi bara komast heim til mömmu.“