Guðjón Pétur Lýðsson leikmaður ÍBV og Hermann Hreiðarsson þjálfari liðsins hafa náð sáttum. Frá þessu segir Guðjón í samtali við Fréttablaðið.
Það sauð upp úr á milli þeirra félaga fyrir tæpum tveimur vikum þegar Hermann tók Guðjón af velli í markalausu jafntefli gegn ÍA í Bestu deildinni. Guðjón var verulega ósáttur við ákvörðun Hermanns og lenti þeim saman.
Síðan þá hefur Guðjón verið í agabanni en núna hafa þeir félagar sest niður og leyst málið. „Ég og Hemmi erum búnir að takast í hendur og ná sáttum í þessu máli,“ segir Guðjón Pétur í samtali við Fréttablaðið í gær.
Guðjón segir að málið sé þó stormur í vatnsglasi.
„Bara 100%. Ég er ekki fyrsti leikmaðurinn sem pirrast yfir því að vera tekinn af velli. Mér finnst þetta hafa verið blásið upp, stormur í vatnsglasi, en svo sem ekkert meira um það að segja. Nú er þetta bara búið og við keyrum á þetta,“