Landsliðshópurinn var opinberaður í vikunni og var hann skeggræddur í íþróttavikunni með Benna Bó á föstudaginn. Hjörvar Hafliðason, doktor Football og íþróttastjóri Viaplay og Jóhann Már Helgason, íþróttaskríbent og sérfræðingur í þættinum sátu í settinu með Benedikt Bóas.
Í hópnum er Hákon Arnar Haraldsson, leikmaður FCK í Danmörku, sem Hjörvar segir að sé einn mest spennandi leikmaður landsins þessi misserin. „Hann er trylltur leikmaður. Það er erfitt að útskýra hvað það er sem gerir hann svona góðan en einn góður sérfræðingur sagði að hann væri eins og Bernardo Silva,“ sagði Hjörvar og uppskar hlátur í stúdíóinu með eftirhermunni sinni af Hrafnkeli Frey, sem einnig er sérfræðingur í Doktor football og í Lengjumörkunum á Hringbraut. „Hann er hrikalega skemmtilegur leikmaður. Það geislar af honum sjálfstraustið og þegar hann skorar þá tekur hann einhvern dans.
Pabbi hans er hæglátur maður, Haraldur Ingólfsson, fyrrum leikmaður ÍA. Það var maður sem hvíslaði nánast í viðtölum því hann var svo feiminn.
Þessi litli mætir út á hornfána og dansar og tekur gítar eða hvað sem er. Hann er þess virði að mæta á þessa landsleiki. Ísak er líka spennandi og ég hefði alveg viljað hafa Þorleif þarna með þeim. En ég horfi á hópinn og sé alveg framtíð í honum,“ sagði Hjörvar.