Dani Alves, bakvörður Barcelona, segir að hann myndi frekar vilja fá Kylian Mbappe til félagsins en Erling Braut Haaland.
Mbappe leikur með Paris Saint-Germain í Frakklandi en Haaland með Dortmund í Þýskalandi. Sóknarmennirnir eru tveir af þeim allra bestu í sínum aldursflokki.
„Ég myndi ekki gera fáránlega hluti til að fá Haaland. Ef ég á að vera hreinskilinn myndi ég ekki eyða miklum pening í hann,“ sagði Alves.
Hann hélt áfram. „Ég myndi eyða miklu í Mbappe, ekki Haaland.“
„Ef þú ætlar að gera risafjárfestingu þá verður þú að fara bestu leiðina að því. Ef ég mætti ráða tæki ég Mbappe frekar.“
