Rio Ferdinand, fyrrum varnarmaður Manchester United, vill að sitt gamla félag fari að fordæmi Arsenal nú þegar að ljóst virðist vera að Erik ten Hag verði næsti knattspyrnustjóri liðsins. Ferdinand vill að Ten Hag fái tíma og stuðning til þess að snúa skútunni við á Old Trafford.

Síðustu ár hafa ekki verið góð fyrir félagið og sigurtímabilin sem liðið átti undir stjórn Sir Alex Ferguson virðast víðs fjarri.

Ferdinand segir að forráðamenn Manchester United verði að treysta Ten Hag verði hann á endanum ráðinn, rétt eins og forráðamenn Arsenal hafa gert í tilfelli Mikel Arteta, knattspyrnustjóra liðsins.

,,Manchester United leitar nú að nýjum knattspyrnustjóra og vonandi mun gæfa félagsins breytast í kjölfarið. Ef maður horfir á Arsenal þá hafa þeir fundið rétta knattspyrnustjórann, þeir treysta honum og hafa leyft honum að gera hluti og taka ákvarðanir sem margir efuðust um,“ segir Rio í samtali við William Hill og bendir á brotthvarf stjörnuframherjans Pierre Emerick-Aubameyang til Barcelona.

,,Þú verður að treysta knattspyrnustjórainum og ferlinum. Vonandi mun Manchester United gera það,“ segir Rio. Hann segir að Manchester United þurfi að sætta sig við stöðuna sem félagið er í núna og byggja ofan á það.