Spænski miðillinn Marca greinir frá því í dag að brasilíska knattspyrnusambandið vilji fá Pep Guardiola til þess að taka við brasilíska karlalandsliðinu eftir að heimsmeistaramótinu í knattspyrnu í Katar lýkur síðar á þessu ári.
Marca segir það vera tilfinninguna innan brasilísku knattspyrnuhreyfingarinnar að það geti reynst vel fyrir brasilíska knattspyrnu að fá inn reyndan spænskan þjálfara.
Enn fremur greinir miðillinn frá því að fulltrúar sambandsins hafi nú þegar sett sig í samband við bróður knattspyrnustjórans en hann er umboðsmaður Guardiola.
Núverandi samningur Guardiola við Manchester City rennur út eftir rúmt ár. Hann hefur verið á mála hjá félaginu síðan í júlí árið 2016.