Liverpool vann 2-0 sigur á Villarreal í fyrri leik liðanna í undanúrslitum Meistaradeildar Evrópu á Anfield í kvöld.

Liðið var miklu meira með boltann í fyrri hálfleik og stjórnaði ferðinni. Liðinu tókst hins vegar ekki að opna vörn gestanna og skapa sér almennileg dauðafæri. Markalaust var í leikhléi. Heimamenn voru áfram mun betri aðilinn í seinni hálfleik og á 53. mínútu komust þeir yfir. Pervis Estupinan setti boltann þá í eigið net eftir fyrirgjöf Mohamed Salah.

Aðeins tveimur mínútum síðar var Liverpool búið að tvöfalda forskot sitt. Sadio Mane skoraði þá eftir undirbúning Salah. Liverpool var líklegra til að bæta við þriðja markinu en Villarreal að jafna. Meira var þó ekki skorað. Liverpool leiðir 2-0 fyrir seinni leik liðanna á Spáni í næstu viku.

Jurgen Klopp sagði eftir leik að hann væri ánægður með frammistöðu sinna manna í kvöld. Hann sagði jafnframt að einvíginu væri ekki lokið þrátt fyrir góða stöðu.

,,Við förum þangað og það verður erfitt umhverfi fyrir okkur. Þið sáuð það í kvöld að þessir leikmenn (Villarreal) berjast með öllu sem þeir eiga,“ sagði Klopp.

,,Ef þeir vinna okkur og fara í úrslit munu þeir eiga það skilið. Ef við vinnum eigum við það skilið.“

Seinni leikur liðanna fer fram á þriðjudag.