Cristiano Ronaldo var pirraður eftir tap Manchester United gegn Everton í ensku úrvalsdeildinni í gær.
Þegar hann gekk til leikmannaganga eftir leik virtist hann brjóta síma hjá áhorfanda í reiðiskasti. Nú virðist sem svo að þær sögusagnir hafi verið sannar. Myndir af símanum hafa birst á samfélagsmiðlum og þá hefur Ronaldo neyðst til að biðjast afsökunar.
„Það er ekki auðvelt að ráða við tilfinningarnar þegar maður gengur í gegnum eitthvað eins og við erum að ganga í gegnum núna. Samt sem áður verðum við að sýna virðingu og þolinmæði og vera fyrirmyndir fyrir unga aðdáendur sem elska þennan fallega leik. Mig langar að biðjast afsökunar á reiðiskasti mínu og ef það er möguleiki á því vil ég bjóða stuðningsmanninum á leik á Old Trafford til marks um virðingu,“ skrifaði Ronaldo á Instagram.