Nokkrir íslenskir leikmenn komu við sögu með sínum félagsliðum í Svíþjóð og Þýskalandi í kvöld.

Hallbera Guðný Gísladóttir lék allan leikinn með Kalmar í 3-1 sigri á sínum gömlu félögum í AIK í sænsku úrvalsdeildinni. Kalmar er með 3 stig í sjöunda sæti deildarinnar.

Þá lék Agla María Albertsdóttir síðustu 20 mínúturnar eða svo í 4-1 sigri Hacken á Hammarby í sömu deild. Diljá Ýr Zomers sat á varamannabekk Hacken í leiknum. Liðið er með 4 stig eftir tvo leiki.

Í efstu deild kvenna í Þýskalandi kom Alexandra Jóhannsdóttir inn á sem varamaður á 65. mínútu í 0-4 sigri Frankfurt gegn Jena. Frankfurt er í fjórða sæti deildarinnar með 37 stig, jafnmörg og Potsdam sem er í þriðja og síðasta Meistaradeildarsætinu. Potsdam á þó leik til góða.

Karlamegin lék Guðlaugur Victor Pálsson síðustu 20 mínúturnar með Schalke í þýsku B-deildinni. Liðið vann 1-2 sigur á Dynamo Dresden. Schalke er í þriðja sæti deildarinnar, umspilssæti, með 50 stig eftir þegar sex umferðir eru eftir. Liðið er aðeins stigi á eftir St. Pauli og Werder Bremen í efstu sætunum en þau eiga þó leik til góða á Schalke.