Þurr gervigrös voru til umræðu í Íþróttavikan með Benna Bó sem var á dagskrá Hringbrautar en formaður meistaraflokksráðs Stjörnunnar skrifaði harðorðan pistil á fótbolta.net í vikunni þar sem hann gagnrýndi KSÍ, Þór og bæjarpólitíkina á Akureyri en einn besti maður Stjörnunnar, Hilmar Árni Halldórsson meiddist að því er virðist alvarlega í leiknum.
Magnús Már Einarsson, þjálfari Aftureldingar og fyrrum ritstjóri Fótbolta.net, mætti í settið ásamt Herði Snævari Jónssyni, íþróttastjóra Torgs og fóru yfir annarsvegar leikinn og hinsvegar gervigrösin á Íslandi.
„Ég vorkenni fyrst og fremst Hilmari Árna,“ sagði Magnús. „Þetta er umræða sem hefur farið fram áður og það þarf að fara gera eitthvað í þessum málum á Akureyri því það er ekki einn góður völlur í þessu bæjarfélagi. KA er með slakan heimavöll og Þór sömuleiðis. Svo er Boginn sem er ónýtur og gervigrösin við KA svæðið er ónýtt. Maður skilur alveg að það sé mikil reiði hjá þessum félögum því það er ekki búið að gera neitt fyrir þau,“ segir Magnús. Hann bætti við að honum finnist eftirá skýringar stjórnmálamanna á Akureyri vera þvæla.
Hörður skilur ekki að Stjarnan hafi spilað á sínu bestu mönnum í leik sem þeir vildu ekki spila á þessum stað. „Ef Stjörnumenn vissu að þetta væri slysagildra, hefðu þeir ekki átt að sleppa að mæta í leikinn og taka þá sekt sem þeir myndu fá. Eða senda annan flokkinn?“
Magnús segir að KR og FH hafi spilað þarna og allir leikmenn þar sloppið. „Slysin gerast og þeir eru óheppnir en það eru miklu meiri líkur þarna á þurrum gervigrasvelli að lenda í þessu en á einhverjum öðrum velli.“
Nánari umræðu um slysagildrurnar á skraufþurru gervigrasi má sjá hér fyrir neðan.