Gunnar Birgisson, íþróttafréttamaður hjá RÚV var gestur í Íþróttavikunni með Benna Bó, ásamt Herði Snævari Jónssyni, íþróttastjóra Torgs og þar var farið yfir víðan völl.

Gunnar hefur vakið mikla og verðskuldaða athygli sem íþróttafréttamaður og íþróttalýsandi á RÚV. Með athyglinni vill oft koma mikil umræða og í tilfelli Gunnars, til að mynda í kringum HM í Katar, hefur nafn hans skotið upp kollinum oft og mörgum sinnum bæði á samfélagsmiðlum sem og í fjölmiðlum.

Benedikt Bóas, þáttastjórnandi Íþróttavikunnar spurði Gunnar að því hvernig það væri fyrir hann að vera orðinn svokallaður ‘frétta matur’.

,,Ég pæli ekki mikið í því,“ svaraði Gunnar og hélt áfram. ,,Maður þarf á sama tíma og maður fær hrós einnig að vera meðtækilegur fyrir gagnrýni sömuleiðis. Maður áttar sig á því að maður getur aldrei verið allra í þessu.

Það sem ég tek aðallega út úr þessu er að þær færslur sem hafa birst um mig, til dæmis í kringum HM í Katar, er að það sem maður er kannski ánægðastur með er hrós frá fólkinu sem að stendur manni næst.

Mamma og pabbi eru kannski að taka það meira inn á sig þegar að einhver er að skrifa eitthvað um mann en maður getur aldrei verið ónæmur fyrir þessum skrifum.“

Gunnar tók dæmi um færslu sem gladdi hann en til hliðar við ströf sín hjá RÚV hefur Gunnar til að mynda þjálfað unga krakka í knattspyrnu.

,,Það fer eitthvað myndband í dreifingu á TikTok og þar eru strákar sem maður hefur þjálfað sem knattspyrnuþjálfari að tala um það hvað þeir séu stoltir af mér.

Það er þetta sem stendur eftir hjá manni, ekki einhverjar neikvæðar athugasemdir um eitthvað sem maður gerir. Ég átta mig fyllilega á því að maður getur aldrei verið allra.“

Umræðuna í heild sinni má sjá hér fyrir neðan: