Hið árlega æfingamót sem Fótbolti.net hefur staðið fyrir í rúm tíu ár fer ekki fram að þessu sinni. Vísir.is segir frá og er því haldið fram að dómarar neiti að vinna við leiki sem Fótbolti.net skipuleggur.

Mótið hefur frá 2011 farið fram í janúar og gefið liðum tækifæri til að koma sér af stað inn í nýtt knattspyrnuár.

Nú hefur hins vegar stjórn Félags deildardómara (FDD) ákveðið að taka ekki þátt og dæma. Samkvæmt Vísi.is er það vegna ummæla sem hafa fallið í útvarps og hlaðvarpsþáttum Fótbolta.net.

„Ég sem ritstjóri Fótbolta.net er búinn að vanda mig mikið við það að inni á okkar miðli sé réttmæt og sanngjörn gagnrýni í garð dómara, og að þeim sé líka hrósað þegar vel er gert. Mér þykir ógeðslega leiðinlegt að þetta sé ákvörðun þeirra. Þetta kemur mér gríðarlega á óvart,“ segir Elvar Geir Magnússon, ritstjóri Fótbolta.net.

Bréf var sent á vefmiðilinn þar sem dómarar greindu frá samkvæmt frétt Vísis.