Ragnar Sigurðsson, fyrrum landsliðskempa og núverandi umboðsmaður fékk sér sæti í Íþróttavikunni með Benna Bó, sem sýnd er á Hringbraut alla föstudaga. Hörður Snævar Jónsson, íþróttastjóri Torgs, sat með Ragnari í settinu. Þeir ræddu góða byrjun Frakka en þeir fóru létt með Ástralíu, 4-1, þrátt fyrir að lenda marki undir í fyrri hálfleik.

Frakkar urðu heimsmeistarar í Rússlandi 2018 og spiluðu til úrslita á EM 2016 en á leið sinni í úrslitaleikinn á heimavelli unnu þeir Ísland í átta liða úrslitum.

Strákarnir okkar þurftu einnig að glíma við Frakkana í undankeppni EM 2020 þar sem báðir leikirnir töpuðust. Ragnar Sigurðsson, fyrrverandi miðvörður íslenska liðsins, spilaði alla þessa leiki og viðurkennir að þar var við ramman reip að draga.

„Frakkarnir eru alltaf góðir. Það var alltaf skrýtið að spila á móti þeim. Olivier Giroud var þarna frammi og hreyfðist varla en var samt alltaf að komast í boltann. Svo var Griezmann alltaf stórhættulegur,“ segir Ragnar.

„Það var alltaf eins og það væri ekkert í gangi hjá franska liðinu en svo komu ein til tvær snöggar sendingar og allt í einu skapaðist stórhætta.“

Giroud er mögulega einn vanmetnasti fótboltamaður seinni tíma en hann stóð vaktina í framlínu franska liðsins á HM 2018 og var lykilmaður þar þrátt fyrir að ná ekki einu einasta skoti á markið alla keppnina.

„Þetta er rugl. Hann notar eiginlega alltaf bara eina snertingu á boltann. Maður þurfti aldrei að elta hann því hann losaði alltaf boltann. En, allar þessar snertingar voru fullkomnar. Ég sá hann bara aldrei klúðra neinu. Það eru ekki margir svoleiðis,“ segir Ragnar.

Giroud mun nú aftur fá stórt hlutverk í Katar því handhafi Gullboltans, sjálfur Karim Benzema, er meiddur. Þetta mun ekki veikja franska liðið að mati Ragnars.

„Mér finnst þetta henta Griezmann alveg sérstaklega vel að spila með Giroud. Það er eins og þeir passi mjög vel saman. Þetta er mjög gott fyrir franska liðið,“ segir Ragnar Sigurðsson.