Sigurður Ragnar Eyjólfsson, þjálfari karlaliðs Keflavíkur, er gestur í nýjasta þætti 433.is, sem er að dagskrá Hringbrautar alla mánudaga.
Í þættinum ræddi hann meðal annars ákveðinn vendipunkt á tímabili Keflavíkur. Þá þurfti mikilvægasti leikmaður liðsins, Patrik Johannesen, að bregða sér heim til Færeyja.
„Það voru alvarleg veikindi í fjölskyldu konunnar hans. Það var ekki hægt að segja annað en já við því. Fjölskyldan er mikilvægust, mikilvægari en fótbolti,“ segir Sigurður, sem segist þarna hafa verið búinn að opinbera markmið liðsins um að enda í efri úrslitakeppni deildarinnar.
„Þá vissi ég að það yrði erfitt að ná markmiðinu og það var það. Við vorum samt ótrúlega nálægt því að ná því,“ segir Sigurður.
Svo fór að Keflavík hafnaði í sjöunda sæti eftir fínasta tímabil.