NFL-stjarnan Tom Brady og eiginkona hans, fyrirsætan heimsfræga Gisele Bundchen, eru sögð vera að skilja. Það kann að hljóma langsótt, en að einhverju leyti gæti Cristiano Ronaldo átt þar í hlut.

Hinn 45 ára gamli Brady og hin 42 ára gamla Gisele hafa verið gift síðan 2009. Eiga þau saman tvö börn.

Brady leikur með Tampa Bay Buccaneers í NFL-deildinni. Hann tilkynnti að hann væri hættur þann 1. febrúar á þessu ári. Aðeins 40 dögum síðar, þann 13. mars tilkynnti Brady að hann væri hættur við að hætta og að hann ætlaði sér að taka annað tímabil með Buccaneers.

Gisele er ekki sögð hafa verið glöð með þetta athæfi Brady. Hann hafi ákveðið að hætta til þess að eyða meiri tíma með fjölskyldu sinni.

Aðeins degi áður en Brady tilkynnti að hann væri að snúa aftur sá hann Ronaldo skora þrennu í leik með Manchester Untied í 3-2 sigri á Tottenham. Brady var í stúkunni á Old Trafford, ásamt eigendum United, Glazer-fjölskyldunni, en hún á einnig Buccaneers.

Eftir leik á Ronaldo að hafa átt samtal við Brady, þar sem hann spurði hann hvort hann væri viss um að hann væri hættur að spila amerískan fótbolta. Degi síðar tilkynnti Brady að hann væri að snúa aftur.

Hins vegar var Gisele allt annað en sátt. Hún hafði bæði áhyggjur af höfuðhöggum sem Brady hafði hlotið við að spila leikinn. Auk þess vildi hún, eins og áður sagði, að hann myndi eyða meiri tíma með henni og börnum þeirra.

Hjónin hafa búið í sitt hvoru lagi í tvo mánuði. Á dögunum sást hún þá án giftingahringsins. Það stefnir allt í að skilnaður sé í kortunum, en þau eru bæði talin hafa haft samband við lögfræðinga.

Brady og Gisele ætla að deila forræði yfir börnum sínum. Það eru þó fjármálin sem gæti orðið erfiðara að ná saman um.

Gisele var lengi ein fremsta fyrirsæta heims. Er hún metin á 355 milljónir punda. Brady er metinn á 222 milljónir punda. Þau þurfa að komast að samkomulagi um það hvernig fjárhagnum verður skipt á milli þeirra.