Newcastle og West Ham hafa bæði mikinn áhuga á því að kaupa Nathaniel Phillips varnarmann Liverpool á næstu dögum.

Félagaskiptaglugginn lokar á mánudag en búast má við miklu fjöri á markaðnum fram að því.

Newcastle hefur mikla fjármuni á milli handanna en félagið hefur klófest Chris Wood og Kieran Trippier í janúar.

Nú vill Newcastle kaupa Phillips sem er 24 ára varnarmaður en Liverpool hefur þegar hafnað beiðni félagsins um að fá hann á láni.

Newcastle hefur gengið erfiðlega í að klófesta varnarmann en liðið hefur reynt við nokkra en án árangurs.

Phillips hefur aðeins spilað þrjá leiki á þessu tímabili en hann fékk fleiri tækifæri á síðustu leiktíð.