Manchester United er með fjóra þjálfara á blaði sem félagið skoðar að ráða í sumar. Það er The Athletic sem segir frá þessu.
Um er að ræða Mauricio Pochettino þjálfara PSG, Erik ten Hag hjá Ajax, Luis Enrique þjálfara Spánar og Julen Lopetegui hjá Sevilla.
Félagið er byrjað að skoða þessi mál og stefnir á að vera með allt klárt áður en tímabilið er á enda.
Pochettino og Ten Hag eru taldir líklegastir en Ralf Ragninck núverandi stjóri liðsins verður með í ráðum. Þýski stjórinn tekur svo sæti á skrifstofu félagsins í sumar.
Pochettino hefur áhuga á því að snúa til Englands og Ten Hag vill fá tækifæri á stærra sviði. Óvíst er hvort Enrique vilji hætta með Spán svo skömmu fyrir Heimsmeistaramótið sem fram fer í lok árs.
