Í nýjum raunveruleikaþætti Georgina Rodriguez, kærustu Cristiano Ronaldo, sem kemur á Netflix 27. janúar fá áhorfendur að kynnast lúxuslífinu sem hún lifir. Í stiklu fyrir þættina heyrist í henni segja að hún viti hvernig það er að eiga ekkert og að hún muni aldrei gleyma hvaðan hún kom.
Ættingjar hennar eru þó ekki sammála þessum orðum hennar. Jesus Hernandez, föðurbróðir Georginu, segist hafa alið hana upp á meðan faðir hennar sat inni í fangelsi fyrir eiturlyfjasmygl.
Hann telur Georginu vera illa innrætta fyrir að loka á öll samskipti við fjölskylduna eftir að hún kynntist Ronaldo.
„Hún skammast sín kannski fyrir okkkur eða telur sig vera yfir okkur hafin því við lifum ekki þessu lúxuslífi.“
„Hún hefur aðeins hringt einu sinni eða tvisvar síðan við komumst að því að hún væri að hitta Ronaldo,“ sagði Jesus Hernandez, föðurbróðir Georginu.
Hann er ekki eini ættinginn sem er ósáttur við Georginu en hálfsystir hennar, Patricia Rodriguez er það líka.
„Þegar sonur minn átti afmæli spurði ég hvort Cristiano gæti árritað treyju fyrir hann en hún sagði bara nei. Hún vildi ekki trufla hann á meðan hann var í fríi,“ sagði Patricia, hálfsystir Georginu.