Thomas Tuchel, knattspyrnustjóri enska úrvalsdeildarfélagsins segir leikmenn sína þreytta, bæði líkamlega og andlega. Chelsea gerði í gær 1-1 jafntefli gegn Brighton á útivelli og hefur ekki tekist að vinna leik í síðustu fjórum leikjum sínum.

Chelsea er sem stendur 12 stigum á eftir á toppliði Manchester City og bensínið virðist búið á tankinum hjá félaginu hvað titilbaráttu varðar.

,,Við virtumst vera þreyttir vegna þess að við erum þreyttir og við vorum að spila á móti sterku og vel undirbúnu Brighton liði,“ sagði Tuchel í viðtali eftir leik í gær.

Hann segir leikjaálagið á liðinu undanfarið hafa verið alltof mikið.

,,Ef þú horfir á dagskránna hjá okkur, hvaðan við erum að koma, þá höfum við átt erfitt uppdráttar undanfarið. Þegar að maður er þreyttur, líkamlega og andlega, reynist það erfiðara fyrir leikmenn að komast í réttar stöður og það ber á skorti á einbeitingu. Við getum séð það í leik okkar og vitum hvaðan það kemur.“

Tuchel segist sjálfur finna fyrir þreyttu þessa stundina. ,,Á einum tímapunkti situr maður í rútunni og hugsar með sér hvert við séum að stefna. Maður verður að ná aftur einbeitingu og hugsa um það hvert við ætlum, hvar við erum að spila næst og hvenær næsti fundur sé á dagskrá.“

Tuchel hélt síðan áfram að tjá sig um leikjaálagið. ,,Þetta hefur verið svona síðan í nóvember. Við erum lið sem spilar og spilar og spilar, við erum farnir að finna fyrir því, að sjálfsögðu.“

Hann uppljóstraði þá um ákvörðun sína um að leikmenn Chelsea fái frí næstu tvo daga til að ná almennilegri endurheimt áður en liðið undirbýr sig fyrir leik gegn Tottenham í ensku úrvalsdeildinni á sunnudaginn.