Tveimur leikjum er nýlokið í ensku úrvalsdeildinni.

Liverpool vann þægilegan sigur á Brentford. Leikið var á Anfield. Þeir leiddu 1-0 í hálfleik þökk sé marki Fabinho skömmu fyrir leikhlé.

Í seinni hálfleik voru heimamenn áfram með völdin á vellinum. Alex Oxlade-Chamberlain kom þeim í 2-0 á 69. mínútu áður en Takumi Minamino innsiglaði 3-0 sigur.

Liverpool er í öðru sæti deildarinnar, 9 stigum á eftir Manchester City en á leik til góða. Brentford er í fjórtánda sæti með 23 stig.

Á sama tíma vann Leeds sigur á West Ham í markaleik. Leikið var á London Stadium.

Jack Harrison fór á kostum fyrir Leeds í leiknum. Hann kom þeim yfir á 10. mínútu. Jarrod Bowen jafnaði fyrir heimamenn á 34. mínútu. Harrison svaraði með öðru marki um hæl.

Pablo Fornals jafnaði metin að nýju snemma í seinni hálfleik. Harrison var hins vegar á ferðinni með sigurmark Leeds eftir klukkutíma leik. Lokatölur 2-3.

West Ham er í fjórða sæti deildarinnar, 2 stigum á undan Arsenal en hefur leikið tveimur leikjum meira. Leeds er í fimmtánda sæti með 22 stig.