Jurgen Klopp, knattspyrnustjóri Liverpool, segist „mjög vongóður“ um að Mohamed Salah framlengi samning sinn við félagið áður en tímabili lýkur.

Salah, sem er 29 ára gamall, segir að framtíð hans sé í höndum Liverpool og að hann sé ekki að biðja um neitt klikkað, en samkvæmt fréttum á Englandi vill Egyptinn fá 300 þúsund pund í laun á viku.

„Ég veit að Mo vill vera áfram. Við viljum hafa hann áfram hjá okkur. Við erum ekki komin lengra en það. Þetta tekur tíma,“ sagði Klopp.

„Ég held að við séum á góðri leið. Stuðningsmennirnir eru ekki eins örvæntingarfullir og fjölmiðlar. Ég er mjög vongóður. Það þarf ekki að hafa neinar áhyggjur; þetta er allt í ferli,“ bætti hann við.

Salah hefur skorað 148 mörk í 229 leikjum með Liverpool síðan hann kom frá Roma sumarið 2017. Hann var hluti af liðinu sem vann Meistaradeildina árið 2019 og batt enda á 30 ára Englandsmeistaratitlaþurrð tímabilið þar á eftir.

Klopp sagði að umboðsmaður Salah hefði aukin áhrif á viðræður. . „Það er svo margt sem þarf að semja um. Það er þriðji aðili líka, með umboðsmanninum,“ sagði hann.

Ramy Abbas Issa, umboðsmaður Salah, vakti athygli á samfélagsmiðlum í ágúst þegar hann sendi frá sér tístið: „Ég vona að þið séuð að horfa“, en þar átti hann víst við frammistöðu Salah gegn Norwich þar sem hann var valinn maður leiksins.