Albert Guðmundsson var ekki valinn í landsliðshóp íslenska karlalandsliðsins fyrir leiki gegn Venesúela og Albaníu síðar í þessum mánuði.
Arnar Þór Viðarsson landsliðsþjálfari var spurður út í ákvörðunina á blaðamannafundi í dag.
„Ég var mjög óánægður og svekktur með hugarfar Alberts í síðasta glugga. Fyrir mér á að vera mikill heiður að vera í landsliðinu og það kallar á 100 prósent hugarfar. Þú ert annað hvort hundrað prósent með okkur í þessu eða ekki,“ segir Arnar.
„Við vitum öll að bestu leikmenn íslenska landsliðsins hafa alltaf sett frammistöðu liðsins fram yfir eigin frammistöðu. Ég held að það sé eina leiðin til að ná árangri.“
Arnar útilokar þó ekki að velja Albert aftur.
„Þetta er ákvörðun sem ég tek fyrir þennan glugga. Ef Albert er til í að vera hluti af þessari liðsheild og vinna eftir viðmiðum sem ég set þá gæti ég að sjálfsögðu valið hann.“