Jose Mourinho, stjóri Roma, sagði nokkur falleg orð um Elísabetu Englandsdrottningu eftir fráfall hennar í gær.
Portúgalinn ræddi Elísabetu eftir tap síns liðs gegn Ludogorets í Evrópudeildinni í gær.
„Mér þykir þetta mjög leitt. Ég er ekki útlendingur í Bretlandi. Þetta er heimili mitt. Ég bjó þarna í mörg ár,“ segir Mourinho, sem hefur starfað hjá Chelsea, Manchester United og Tottenham á Englandi.
Hann hefur ekkert nema gott að segja um Elísabetu. „Hún var yndisleg. Ég veit ekki um neinn sem virti hana ekki.“
Öllum leikjum helgarinnar í ensku úrvalsdeildinni hefur verið frestað, þar sem þjóðarsorg ríkir í Bretlandi vegna fráfalls Elísabetar.
Þetta á einnig við aðra knattspyrnuleiki á Englandi en þjóðarsorg ríkir í Bretlandi vegna andláts Elísabetar.
Yfirvöld í Bretlandi höfðu gefið grænt ljós á að leikirnir færu fram en deildirnar ákváðu að spila ekki.