Mikael Nikulásson, sparkspekingur Þungavigtarinnar, lét í sér heyra í þætti föstudagsins og var harðorður í garð Þróttar Vogum.

Þróttur gerði stór mistök í síðasta leik sínum gegn HK er liðið þurfti að nota útileikmann í marki eftir meiðsli Rafal Stefáns Daníelssonar.

Rafal var eini markmaður Þróttar á skýrslu og eftir að hann meiddist þurfti Þróttur að setja útileikmann í markið í stöðunni 1-1.

HK var ekki í vandræðum eftir þessi skipti og skoraði þrjú mörk fyrir lokaflautið til að tryggja öruggan 4-1 sigur.

Mikael baunar á bæði Þrótt og Brynjar Þór Gestsson sem er þjálfari liðsins en hann ákvað að lána varamarkvörð liðsins fyrr á tímabilinu sem kom svo sannarlega í bakið á liðinu.

,,Já, ef þetta er rétt. Ég tek þetta á mig því ég ákvað að lána varamarkvörðinn? Er þá bara einn markmaður á æfingu spyr ég í fyrsta lagi – af hverju hætta þeir ekki bara núna og mæta í aðra deildina á næsta ári,“ sagði Mikael um hvort þetta hafi verið mesta áhugamennska sem hafi sést á Íslandi.

,,Þú getur mætt með einn markmann í leik en það er þá því hinn markmaðurinn er í banni, þú nærð ekkert auðveldlega í markvörð á miðju seasoni eða að markmaðurinn sé meiddur.“

,,Þegar þú lánar sjálfur varamarkmanninn þinn, það kemur ekki til greina. Varamarkmaður hvort sem það sé í efstu deild, fyrstu deild eða annarri deild þarf að vera með þokkalega góðan samning þó hann sé ekki að spila neitt.“

,,Það er bara þannig að það eru 16 leikir búnir, menn geta rifist um það hversu sterk deildin er, hún er ekkert slök en hún er ekkert stórkostleg. Þetta er fín deild en þeir eru með sex stig.“