Jack Grealish hefur svarað íþróttamiðlinum SPORTbible fullum hálsi eftir að vefsíðan flutti fréttir af því hvað hann átti að hafa sagt við Pep Guardiola á hliðarlínunni í leik Manchester City gegn West Ham um helgina.
City var mun sterkari aðilinn í leiknum og vann 0-2.
SPORTbible birti myndir af Grealish og Guardiola, stjóra City, á hliðarlínunni. Samkvæmt miðlinum var leikmaðurinn að segja Spánverjanum „hvert hann ætti að fara.“
Þetta segir Grealish algjört kjaftæði. „Andskotinn hafi það. Allt sem þið skrifuðuð gerðist ekki. Þvílík skítasíða. Hann var að gefa mér taktísk ráð, spyrjið hann hvort ég hafi sagt eitthvað á móti,“ skrifaði Grealish undir færslu SPORTbible á Twitter.
Miðillinn hefur nú eytt færslunni.
Grealish er að fara inn í sitt annað tímabil með City eftir að hafa verið keyptur á 100 milljónir punda frá Aston Villa í fyrra.
