Cristiano Ronaldo er sterklega orðaður frá Manchester United þessa stundina.
Portúgalinn sneri aftur til félagsins síðasta sumar, tólf árum eftir að hann yfirgaf það fyrir Real Madrid.
Fyrsta tímabilið eftir endurkomuna var enginn draumur í dós. Sjálfur átti Ronaldo fínasta tímabil en Man Utd hafnaði þó í sjötta sæti.
Ronaldo hefur engan áhuga á að leika í Evrópudeildinni á næstu leiktíð og er því sagur leita sér að félagi í Meistaradeild Evrópu.
Chelsea hefur verið nefnt til sögunnar og nú síðast hefur Barcelona bæst við í hóp áhugasamra félaga, ef marka má frétt AS á Spáni.
Blaðið segir að Jorge Mendes, umboðsmaður Ronaldo, hafi rætt hugsanleg félagaskipti við Barcelona.
Ronaldo var hjá erkifjendum Börsunga í Real Madrid frá 2009 til 2018. Það er því ljóst að stuðningsmenn síðarnefnda félagsins myndu seint fyrirgefa honum, færi hann til Katalóníufélagsins.