Rúnar Alex Rúnarsson, landsliðsmarkvörður og leikmaður Arsenal, segist afar sáttur með að leika undir stjórn Arnars Þórs Viðarssonar hjá landsliðinu.
Arnar Þór tók við karlalandsliðinu árið 2020. Gengi liðsins hefur ekki verið upp á marga fiska síðan en Arnar hefur þó þurft að glíma við erfiðar aðstæður, þar sem lykilmenn hafa til að mynda margir hverjir ekki verið honum til taks.
„Ég dýrka það, mér finnst hann frábær þjálfari,“ sagði Rúnar Alex í hlaðvarpsþættinum Chess After Dark, spurður út í hvernig það sé að spila undir stjórn Arnars.
„Hann er mjög skipulagður, taktískt er ég mjög ánægður með hann og svo er hann heiðarlegur, mér finnst það bara númer eitt, tvö og þrjú í fari þjálfara. Þú þarft ekkert að vera besti þjálfari í heimi eða hafa mestu þekkinguna um fótbolta. Þú þarft bara að vera góður í mannlegum samskiptum og heiðarlegur til þess að fá traust leikmanna, hann er það.“
Rúnar segir að fólk þurfi að taka inn í myndina að Arnar hefur þurft að glíma við erfiðar aðstæður. „Hann þarf að fá tíma og hafa sama lið nokkra leiki í röð. Það er margt sem spilar þarna inn í. Auðvitað hefðu úrslitin mátt vera betri en hann var með glænýtt lið í hverjum einasta glugga, fjóra fimm glugga í röð. Það er ekkert auðvelt fyrir þjálfara að byrja upp á nýtt í hvert einasta skipti.“
„Við erum á réttri leið,“ sagði Rúnar einnig.
Rúnar segir að það myndi hjálpa landsliðinu ef umræðan í kringum það væri jákvæðari en hún hefur verið. „Við viljum vinna leiki á heimavelli, ná í þessi úrslit sem gullkynslóðin var að ná í og fara á stórmót. En það hjálpar okkur að umræðan sé góð. Þá er miklu auðveldara að gíra sig upp í leiki og ná í úrslit.“