Son Heung-Min, leikmaður Tottenham, hefur greint frá því að hann hafi fyrst reynt fyrir sér á Englandi fyrir 13 árum síðan og fór á reynslu hjá tveimur liðum.
Son er einn besti sóknarmaður ensku deildarinnar í dag og hefur staðið sig gríðarlega vel í London eftir að hafa komið frá Leverkusen árið 2015.
Sex árum fyrir það voru tvö ensk lið áhugasöm en bæði Portsmouth og Blackburn vildu sjá hæfileika leikmannsins.
Það gekk hins vegar erfiðlega fyrir Son á Englandi sem var fljótt farinn aftur til Þýskalands þar sem hann samdi árið 2008.
Son spilaði með Hamburg í Þýskalandi frá 2008 til 2013 og fór síðar til Leverkusen og svo Tottenham.
,,Ég átti enga vini þarna, enga fjölskyldu og ég gat ekki talað tungumálið,“ sagði Son í samtali við Mail.
,,Ég kunni ekki eitt einasta orð. Ég var alveg einn og var hræddur, þið skiljið. Þetta var virkilega erfitt.“
,,Ég fór á reynslu hjá Portsmouth og Blackburn líka. Ég var búsettur í gestahúsi en ég var krakki og vissi ekki neitt. Það eru fyrstu kynni mín af Englandi, og þau voru ekki góð.“