Guðrún Arnardóttir varð í dag sænskur bikarmeistari með Rosengard er liðið vann 2-1 sigur gegn Hacken í úrslitum.

Guðrún var að vanda í vörn Rosengard og lék allan leikinn sem fór í framlengingu eftir 1-1 jafntefli í venjulegum leiktíma. Agla María Albertsdóttir sat allan tímann á varamannabekknum hjá Hacken.

Milos Milojevic stýrði Malmö til sigurs í úrslitum sænska bikarsins en lærisveinar hans unnu Hammarby 4-3 í vítaspyrnukeppni eftir markalaust jafntefli. Milos er íslenskur ríkisborgari og var áður þjálfari Breiðabliks og Víkings en hann lék með síðarnefnda félaginu.

Midtjylland varð danskur bikarmeistari í dag eftir sigur á OB en sá leikur fór einnig í vítaspyrnukeppni þar sem Midtjylland hafði betur, 4-3.

Landsliðsmarkvörðurinn Elías Rafn Ólafsson var ekki í hóp í dag vegna meiðsla og Aron Elís Þrándarson ekki heldur.