Hrækt var á Óskar Hrafn Þorvaldsson þjálfara Breiðabliks er liðið heimsótti ÍA í Bestu deild karla á laugardag. Frá þessu greindi Kristján Óli Sigurðsson í Þungavigtinni.

Breiðablik gerði góða ferð á Akranes á laugardag þar sem liðið vann 1-5 sigur á Skagamönnum. Mikil stemming hefur verið í stúkunni hjá Skagamönnum í upphafi Bestu deildarinnar en hluti stuðningsmanna virðist þó hafa farið fram úr sér á laugardag.

„Ég trúði því ekki þegar ég fékk þetta, þetta er galið. Í stúkunni er misjafn sauður í mörgu fé, það voru sauðir sem ákváðu að hrækja á Óskar Hrafn. Við erum með myndband af þessu þar sem hann þurrkar hráku af hendinni á sér,“ segir Kristján Óli í Þungavigtinni.

Kristján segir að málið sé í skýrslu dómarans. „Þetta hlýtur að hafa eftirmál, þetta er komið í skýrslu dómarans.“

Samkvæmt heimildum 433.is rigndi hrákum yfir bekk Breiðabliks nánast linnulaust allan síðari hálfleikinn en hið minnsta ein endaði á Óskari Hrafni.

Eggert Ingólfur Herbertsson formaður knattspyrnudeildar ÍA kvaðst í samtali við 433.is meðvitaður um málið, hann sagði Skagamenn taka því alvarlega og að farið yrði í aðgerðir til þess að koma í veg fyrir að svona atvik komi upp aftur.

Bekkur Breiðabliks var fyrir aftan stuðningsmenn ÍA en á sama tíma var bekkur Skagamanna fyrir framan stuðningsmenn Breiðablik, Skagamenn skoða það að setja gestaliðið fyrir framan sína stuðningsmenn og bekk Skagamanna fyrir framan stuðningsmenn ÍA.

Stuðningsmenn ÍA hafa fengið mikið lof fyrir frammistöðu sína í stúkunni í upphafi móts en gríðarleg stemming er í kringum þá.