Gunnar Heiðar Þorvaldsson, stýrir sínum fyrsta leik sem þjálfari Vestra í Lengjudeildinni á morgun þegar að Djúpmenn heimsækja Gróttu á Vivaldi-vellinum á Seltjarnarnesi. Gunnar tók við Vestra korteri í mót og segir liðið stefna á að gera betur í ár en í fyrra.
433.is/Fréttablaðið og sjónvarpsstöðin Hringbraut verða heimili Lengjudeildarinnar í sumar. Leikur Gróttu og Vestra verður sýndur í beinni sjónvarpsútsendingu á Hringbraut klukkan 14:00 á morgun.
,,Hér er mjög gott að vera. Þetta hefur komið mér skemmtilega á óvart og þá sérstaklega þegar sólin lætur sjá sig hérna, þá er þetta algjör paradís,“ segir Gunnar Heiðar í samtali við 433.is um fyrstu mánuði sína sem þjálfari Vestra en Gunnar býr í Bolungarvík um þessar mundir.
Hefur kynnst aðstöðuleysinu
Hann hefur fengið að kynnast aðstöðuleysi knattspyrnudeildar Vestra en ómögulegt er að æfa knattspyrnu á eðlilegan máta yfir vetrarmánuðina á Ísafirði.
,,Þetta er náttúrulega, ef ég á að segja alveg eins og er, nokkuð spes. Að aðstaðan skuli vera svona árið 2022 í bæjarfélagi eins og Ísafjarðarbæ.“
Gunnar Heiðar fundaði í gær, ásamt forsvarsmönnum Vestra, með Vöndu Sigurgeirsdóttur, formanni KSÍ og frambjóðendum til sveitastjórnarkosninga í Ísafjarðarbær þar sem aðstöðumál félagsins voru rædd.
,,Þar var farið vel yfir aðstöðuleysið hjá okkur í Vestra, við getum bara sagt það hreint út. Það sem maður dregur frá þeim fundi er að það er vilji til að gera betur. Svo ræðst framhaldið bara á úrslitum kosninganna en það er deginum ljósara að spýta þarf í lófa hvað þetta varðar og keyra þetta í gang.“
Þurfti að aðlagast strax
Gunnar Heiðar var ráðinn þjálfari Vestra ,,korter í mót“ eins og hann segir sjálfur frá þegar að Jón Þór Hauksson yfirgaf Vestra og tók við ÍA. Gunnar Heiðar segir að þrátt fyrir að ekki hafi verið um ‚‘drauma scenario‘ að ræða hafi hlutirnir gengið vel í upphafi hans stjórnartíðar.
,,Ég hef verið það lengi í þessum bransa að ég veit alveg hversu óútreiknanlegur hann getur verið. Þessa fyrstu mánuði höfum við þurft að glíma við alls konar aðstæður, höfum ekki geta tekið æfingaleiki fyrir sunnan sökum þess að heiðin er lokuð en þetta byrjaði að rúlla almennilega hjá okkur þegar að við fórum til Spánar í æfingaferð í upphafi aprílmánaðar.“
Aðstæðurnar eins og þær hafa verið fyrir vestan gera það að verkum að Vestri er komið styttra í sínum undirbúningi en önnur lið.
,,Ég myndi segja að við værum einum til tveimur mánuðum á eftir öðrum liðum í þessari deild hvað undirbúning varðar en þetta er bara Vestri. Við gerum gott úr þessu og ég er mjög ánægður með strákana í liðinu hjá mér, þeir hafa tekið þetta á kassann og margir þessara leikmanna hafa verið hér í nokkur ár og vita hvernig hlutirnir ganga fyrir sig hérna.“
,,Við erum allir á sömu blaðsíðunni hvað verkefnið framundan varðar. Við gerum þetta almennilega og erum klárir í fyrsta leik, það er klárt mál.“
Vestra hefur tekist það sem hefur oft á tíðum vantað hjá liðinu, lykilmenn hafa skrifað undir nýja samninga og kjarninn í leikmannahópnum er sá sami og í fyrra. Auk þess hafa ný nöfn verið fengin til liðsins.
,,Það var eitt af því sem mér fannst heillandi við þetta starf, að tekist hefur að halda í sama kjarna leikmannahópsins frá því í fyrra. Mér finnst það gríðarlega mikilvægt, sérstaklega hvað erlendu leikmennina varðar. Þeir vita út í hvað þeir eru að fara og þá er einnig hægt að byggja ofan á starfið sem búið er að byggja upp.“
,,Það er klárlega það sem ég er að reyna gera með liðið með minni nálgun. Ég reyni að þróa minn stíl inn í það sem búið var að gera hérna og um leið að reyna taka liðið upp á næsta stig.“
Gunnar segir að fyrstu viðbrögðin þessari nálgun hans á verkefnið hafi bara verið jákvæð af hálfu leikmanna og forráðamanna félagsins.
,,Þetta er hörku hópur sem ég er með í höndunum, það er hörkufólk sem starfar í kringum félagið með mikinn metnað og ég elska að vera í svoleiðis umhverfi.“
Setja spurningarmerki við Vestra
Spár sem hafa verið gerðar fyrir tímabilið ber ekki saman um það hvernig gengi Vestra mun vera í sumar. Litið er á liðið sem spurningarmerki en því var til að mynda á einhverjum tímapuntki spá í öll sæti frá því fyrsta niður í það tólfta af fyrirliðum og forráðamönnum liðanna í Lengjudeildinni.
,,Ég held það sé alveg eðlilegt að margir setji spurningarmerki við okkur. Við höfum í raun bara náð að æfa almennilega saman í mánuð allur hópurinn, nýr þjálfari með nýjar áherslur. Ég skil alveg að margir séu ekki vissir með okkur en það er náttúrulega bara undir okkur komið að afsanna það og sýna það strax fyrir hvað við stöndum. Við byrjum á því strax á morgun á móti Gróttu.“
,,Markmið mitt er að halda áfram því góða starfi sem hefur verið í gangi hjá Vestra, halda áfram að byggja ofan á það. Þú færð bara þetta klassíska svar, við viljum gera betur en í fyrra.“
Byrja á útileikjum
Vestri fær krefjandi byrjun á mótinu en liðið byrjar á þremur útileikjum í Lengjudeildinni áður en liðið leikur sinn fyrsta heimaleik á Ísafirði. Gunnar segir það mikilvægt fyrir Vestra, rétt eins og önnur lið, að byrja vel.
,,Þetta er oft þannig að eftir fyrstu fimm, sex leikina fer deildin að taka á sig ákveðna mynd. Ég ætla ekki að ljúga neinu að þér, ég veit voða lítið um önnur lið í þessari deild. Þetta er í fyrsta skipti sem ég tek þátt í Lengjudeildinni þannig að ég hef verið í því að afla mér upplýsinga um liðin í deildinni og mynda mér skoðun á þeim.“
,,Svo einbeiti ég mér að því hvað við getum gert á móti þessum liðum. Ég hugsa rosalega mikið um það hvað við viljum gera, stilla okkur saman og hámarka okkar getu.“
,,Ef við gerum það munum við eiga helvíti gott mót,“ sagði Gunnar Heiðar Þorvaldsson, þjálfari Lengjudeildarliðs Vestra í samtali við 433.is
