Það var líf og fjör í Íþróttavikunni hjá Benna Bó á Hringbraut í gær þar sem Arnar Daði Arnarson þjálfari Gróttu og Arnór Smárason leikmaður Vals voru í góðum gír.

Arnór Smárason var hetja Vals í fyrstu umferð Bestu deildarinnar og skoraði sigurmark liðsins gegn ÍBV. Arnór átti erfitt ár í fyrra en hefur lagt mikið á sig í vetur til að sanna ágæti sitt.

„Það var mikið gym, það var það. Það þurfti að styrkja líkamann eftir tvö tímabil frá,“ segir Arnór sem kom heim úr atvinnumennsku fyrir síðasta tímabil.

„Ég er búinn að ná heilu undirbúningstímabili alveg, ég kem ferskur inn í sumarið. Það er frábært að þetta sé að byrja, það er æðislegt að deildin sé kominn í gang.“

Arnór byrjaði á bekknum gegn ÍBV en kom sterkur inn. Hann segir eðlilegt að pressa sé á honum að standa sig vel. „Komandi heim í fyrra og vera ekki í standi, eðlilega smá pressa á manni. Ég hafði verið erlendis í sautján ár, það er erfitt að standa sig þegar þú ert ekki í standi. Vonbrigða tímabil í fyrra, ég tók vel á því í vetur. Það var klárlega léttir en líka geggjað fyrir okkur að byrja á sigri, byrja deildina sterkt. Ágætis stemming á Hlíðarenda með.“

„Fögnuðurinn eftir markið sýnir hversu sterkur hópurinn er, það er búið að vera mikið tal um Val. Sem er geggjað og það er pressa sem er geggjað, þú vilt taka þessu pressu til þín. Mér finnst við sem lið mjög samstilltir og mjög góður mórall í liðinu, það sýndi sig í þessu augnabliki.“

Leikmenn Vals funduðu fyrir mót og sagði Arnór frá þeim fundi í þættinum.

„Það er mikil samkeppni, en samkeppni á góðan máta. Við erum í þessu saman, við tókum léttan fund. Haukur Páll og fleiri og ákváðum snemma að hver sem spilar, þá erum við saman í þessum. Við bökkum hvern annan upp, við komum með það hugarfar inn í deildina. Það er samkeppni, innan vallar eða í Pub Quiz eða pílu. Þannig andrúmsloft viltu hafa.“

„Það er alltaf pressa ef þú ert að spila í Val, í rauninni ekki. Við viljum sækja titilinn aftur.“