Jóhannes Karl Guðjónsson, aðstoðarlandsliðsþjálfari íslenska karlalandsliðsins í knattspyrnu, segir að hann og sonur hans, landsliðsmaðurinn Ísak Bergmann Jóhannesson, muni haga sínu samstarfi í kringum landsliðið faglega. Í landsliðsverkefnum sé hann ekki pabbi neins leikmanns, heldur þjálfari.
Jóhannes Karl var spurður út í þessa stöðu í þættinum 433.is í vikunni.
,,Við erum lítil þjóð og það hafa oft komið upp svona hlutir, bæði tengsl í félagsliðum á Íslandi og einnig í landsliðinu, sagan hefur alveg sýnt okkur það. Í svona stöðu þarf bara að geta sett allar tilfinningar til hliðar. Ég er náttúrulega pabbi hans Ísaks en þegar að komið er í verkefnið er ég ekki pabbi neins leikmanns. Þá er ég bara þjálfari og ég hef engar áhyggjur af því að bæði ég og hann (Ísak) munum vinna þetta faglega,“ sagði Jóhannes Karl.
En hann segist auðvitað hafa þurft að velta þessu fyrir sér ,,og ég þurfti að ræða þetta sérstaklega við Arnar þegar að viðræður okkar voru komnar á þetta stig. Það þurfa að vera ákveðnir verkferlar í gangi og faglegheitin í algjörum toppi, það verður faglega gert,“ segir Jóhannes Karl Guðjónsson, aðstoðarlandsliðsþjálfari íslenska karlalandsliðsins í knattspyrnu í þættinum 433.is
