Bruno Fernandes telur að koma Cristiano Ronaldo til Manchester United muni hjálpa liðinu við að vinna titla á þessu tímabili.
Portúgalski miðjumaðurinn hefur spilað vel fyrir Manchester United frá því að hann skrifaði undir við félagið í janúar 2020. Hann hefur þó ekki ennþá unnið bikar með liðinu. Bruno telur að það muni loksins gerast með komu stórstjörnunnar Cristiano Ronaldo sem hefur unnið 33 titla á ferlinum.
„Allir eru mjög glaðir að hann sé kominn aftur, líka leikmennirnir,“ sagði Bruno við vefsíðu Manchester United.
„Við vitum hvað hann gefur okkur og okkar markmið er að vinna og því markmiði deilir Cristiano með okkur. Með hann í liðinu erum við nær því að vinna titla.“
Manchester United hefur ekki unið titil eftir að Ole Gunnar Solskjaer tók við stjórn liðsins af Jose Mourinho í desember 2018. Síðasti titill liðsins er Evrópudeildarbikarinn frá 2017.