Arnar Þór Viðarsson og Eiður Smári Guðjohnsen, þjálfarar íslenska karlalandsliðsins í fótbolta velja í dag landsliðshóp sinn fyrir komandi leiki liðsins í undankeppni HM 2022. Íslenska liðið mætir Armeníu 8. október og Liechtenstein 11. október. Báðir leikirnir fara fram hér á landi.
Íslenska liðið hefur ekki fundið taktinn í undankeppni HM en fjarvera lykilmanna hefur gert Arnari og Eiði Smára verulega erfitt fyrir.
Ljóst er að fjöldi lykilmanna verður fjarverandi í þessu verkefni en má þar nefna Alfreð Finnbogason, Sverrir Inga Ingason og Kolbein Sigþórsson sem allir eru meiddur. Þá er Gylfi Þór Sigurðsson í farbanni á Bretlandseyjum vegna rannsóknar lögreglu.
Aron Einar Gunnarsson fyrirliði liðsins missti af síðasta verkefni eftir að hafa greinst með COVID-19 veiruna. Aron hefur náð heilsu hins og verið í fullu fjöri með Al-Arabi í Katar undanfarnar vikur.
Stjórn KSÍ og formaður sambandsins sögðu af sér rétt fyrir síðasta verkefni, ásakanir um að hylma yfir meint kynferðisbrot landsliðsmanna urðu til þess. Núverandi stjórn lætur af störfum á laugardag og stjórn til bráðabirgðar tekur við.
Fyrir síðasta verkefni bannaði stjórnin Arnari að velja tvo leikmenn í landsliðshópinn. Kolbeinn Sigþórsson var annar þeira en mál hans hefur verið rakið í fjölmiðlum síðustu daga, Kolbeinn var sakaður um ofbeldisbrot árið 2017. Náðust sættir í málinu en Kolbeinn hefur alla tíð neitað sök í málinu.