Guðlaugur Baldursson mun ekki halda áfram með Þrótt á næsta tímabili en liðið féll úr Lengjudeildinni niður í 2. deild á tímabilinu.
Guðlaugur tók við Þrótti fyrir tímabilið en gengi liðsins var ekki gott í sumar. Í tilkynningu félagsins segir að Guðlaugur hafi óskað eftir því að láta af störfum. Einnig segir að leit að nýjum þjálfara sé þegar hafin. Tilkynningu Þróttar má sjá hér að neðan.
„Í dag, 28. september 2021, tilkynnti Guðlaugur Baldursson þjálfari meistaraflokksliðs karla í Þrótti, að hann óskaði eftir að láta af störfum. Stjórn deildarinnar hefur orðið við þeirri ósk þó hún hefði gjarna vilja vinna með Guðlaugi áfram. Stjórn knd. vill af þessu tilefni þakka Guðlaugi fyrir afar gott samstarf sem aldrei hefur borið skugga á, góð kynni og mikilvægt framlag til Þróttar. Stjórn knd. Þróttar óskar Guðlaugi jafnframt velfarnaðar í leik og starfi í framtíðinni.
Leit að þjálfara til að leiða karlalið Þróttar upp úr 2. deild er þegar hafin.“